LAOAG CITY – Kinumpirmaran ni P/Lt.Col. Ryan Retotar, Hepe ti Laoag City Police Station a nabartek ti driver ti motorsiklo a natay ken nauram kalpasan a nadungparna ti nakaparada nga SUV iti Padsan Bridge iti Barangay 45, Tangid ditoy siudad ti Laoag.
Nabigbig ti biktima a nangiturong ti Yamaha Aerox a ni Mark Renier Laureta, agtawen ti 19, tubo idiay Vigan, Ilocos Sur ngem agdama nga agnanaed iti Barangay 13 ditoy siudad ti Laoag idinto a ti kinalubonna ket maysa a babai nga agtawen ti 17 ken residente ti Barangay San Marcelino iti ili ti Dingras.
Nabigbig met ti driver ti SUV a Nissan Patrol a ni Anthony Elo Lazaro, agtawen ti 39 ken residente ti Barangay 1, San Francisco iti ili ti San Nicolas.
Segun ken ni P/Lt.Col. Retotar, basar iti inwayatda nga imbestigasion, nakita ti biktima a naggapu iti maysa a pagiinuman sakbay ti nakaam-ames a disgrasia.
Inbatadna nga addan ti saritaan ti nagbaetan ti pamilia ti biktima ken ti driver ti SUV no sadinno a mangipaay ti tulong pinansial daytoy.
Basar iti imbestigasion ti Laoag City Police Station – Traffic Division, agarup 4:40 ti parbangon, kabayatan a dumaldalyasat ti nakamotorsiklo nga agturong nga agpa-amianan iti paset ti Padsan Bridge ket kellaat a nadungparna ti naka-parking nga SUV a nakasango iti amianan.
Gapu iti daytoy, iti kinapigsa ti impact ti disgrasia ket nauram ti driver ti motorsiklo idinto a naipurwak ti kinalubbonna ken nagsagaba ti sugat iti nagduduma a paset ti bagina.
Maipalagip a naideklarar a dead on the spot ti driver ti motorsiklo babaen iti responding physician a ni Dr. Rodrigo Catcatan idinto a ti kinalubbonna ket naitaray iti Governor Roque B. Ablan Sr. Memorial Hospital para iti pannakatamingna ken saan met a naan-ano ti nangiturong iti SUV.
Immuna iti daytoy, inpakaammo ni Mr. Christian Bonifacio, kadua ti driver ti SUV a nag-parking-da iti igid ti rangtay gapu ta naawananda ti gasolina isut gapuna a napan gimmatang ti gasolina ti kaduana a driver ti SUV.
