LAOAG CITY – Inpakaammo ni P/Cpt Randy Damo, Hepe ti San Nicolas Municipal Police Station nga adda iti naangay a panagtataripnong babaen iti Sports Committee ket naimbitaran ti biang dagiti otoridad, referee, Sangguniang Bayan ken dagiti coaches ti dua nga umaayam a nagkakabil kabayatan ti Basket Tournament iti nasao nga ili.
Segun kenkuana, ti namunganayan dagiti panagkakabil dagiti umaayam kabayatan ti Tournament iti nagbaetan ti Brgy. 6 ken Brgy. 15 iti Mini Cultural Center iti nasao nga ili ket gapu ta immuna a kimmabil ti maysa a player iti padana met laeng a player agingga a nagbinnara dagitoy.
Kinunana nga adda dagiti otoridad nga agbanbantay iti basketball court ket dagus dagitoy a napan nagresponde pakairamanan dagiti referee tapno maanawa dagiti dua a team ti basketball.
Inlawlawagna nga apaman a nakasangpet dagiti pulis iti lugar ket dagus met a nagtalna dagiti maseknan nga umaayam.
Innayonna, a napatawan ti pannakasuspenso dagiti agpada nga umaayam tapno saanen pay a maulit ti nadakamat a banag.
Kabayatanna, agtultuloy ti panagmonitor dagiti otoridad kadagiti ay-ayam iti Basketball Tournament iti Mini Cultural Center ti San Nicolas ken nagpalagip daytoy a masapul a sureten dagiti pagannurutan sakbay wenno madama ti ay-ayam tapno maliklikan ti kapada nga insidente.
Maipalagip nga adda manen dagiti umaayam ti nagkakabil kabayatan ti panagay-ayamda ti basketball iti napalabas a tawen.
