LAOAG CITY – Inbatad ti City Drug Enforcement Unit a ti estudyante a naarestar iti naisayangkat nga anti-illegal drug buy-bust operation idi kalman ket maibilang kas Street Level Individual iti Drug watchlist ti Philippine National Police ditoy ciudad ti Laoag.
Ti subject ti operasyon ket agtawen ti 19, estudyante iti Data Center College of the Philippines ken residente iti Barangay Dariwdiw iti ciudad ti Batac.
Basar iti Philippine National Police, intudo dagiti immunan a natiliw gapu iti illegal a droga ti nasao nga estudyante isut gapuna a minonitor dagiti otoridad agingga nga insayangkatan da daytoy ti operasyon.
Immuna iti daytoy, dagus a kinemmeg dagiti otoridad ti subject ti operasyon kalpasan a naglako ti maysa a sachet a naglaon ti maipagarop a napagango a bulong ti marijuana iti maysa a pulis a nagpammarang kas poseur-buyer.
Nakumpiskar pay iti ikot na ti maysa a pakete ti sigarilyo a naglaon metlaeng ti maipagarop a marijuana ken ti sangaribo a pisos a nausar iti operasyon.
Rumrumuar nga agdagsen ti 19 a gramo dagiti nakumpiskar a maipagarop a marijuana manipod ken ni Bolo.
Kabayatanna, naiget a naglikudan ti estudyante dagiti ebidensya a naala manipod kenkuana.
Inpetteng na a magmagna a mapan iti pageskwelaan na idi maipagarop nga adda ti nangsada kenkuana a pulis kalpasan na ket ginammatan ken pinosasan dan daytoy, kagiddan ti maipagarop a panangipabulsa dan ti illegal a droga.
Inpaganetget na a naipabulsa laeng kenkuana dagiti nakumpiskar nga ebidensya gapu ta awan ti illegal nga aktibidad na.
