LAOAG CITY – Agtultuloy ti naun-uneg nga imbestigasyon nga isaysayangkat dagiti kameng ti pulisya kalpasan ti napasamak a desgrasya a nakatayan ti maysa a lalaki iti paset ti Barangay 19 iti ili ti San Nicolas.
Ti biktima a nakalugan ti motorsiklo ket agnanaed iti nasao a barangay ngem tubo iti Panacol, Pangasinan idinto a ti kinadinnungpar na ket maysa a mercedes benz nga inturong ti agtawen ti 46, naasawaan, driver ken residente iti Brgy. 50 Buttong ditoy ciudad ti Laoag.
Segun kenni Police Corporal Aldrin Ramil, ti imbestigador ti insidente, ti van ket nagluganan ti baket a biktima met laeng iti desgrasya iti ili ti Dingras ken maitaray kuma iti Mariano Marcos Memorial Hospital and Medical Center iti ciudad ti Batac.
Rumrumwar a ti baket a nakalugan ket nasakit ti siket na ken adda ti dugol na.
Gapo iti pannakadesgrasya da bayat ti pangturong da iti ospital ket dagiti laengen pulis ti nangitaray kenkuana.
Kabayatanna, maiyur-uray ti medical certificate ti pimmusay tapno madeterminar no adda iti impluwensya ti nasanger idinto a ti driver ti van ket saan a nakainom.
Iti agdama, ti inisyal a makitkita dagiti pulis a rason ti desgrasya ket gapo iti maipagarop a kinapaspas ti taray ti nakamotorsiklo ken panangagaw na ti linya.
Kabayatanna, nakigtot dagiti kameng ti PNP iti ili ti Dingras kalpasan a naammoan da nga naaksidente iti ili ti San Nicolas ti nakaluganan ti biktima nga immunan a nadesgrasya iti Brgy. Barong iti ili ti Dingras.
Ti Mercedez Benz a nadesgrasya iti ili ti San Nicolas ti nakailuganan ti biktima ti desgrasya iti ili ti Dingras ken itaray na koma iti Mariano Marcos Memorial Hospital and Medical Center iti ciudad ti Batac.
Nupay kasta, apaman nga adda iti paset ti Brgy 19 iti ili ti San Nicolas partikular iti abagatan ti ice plant ket nakadinnungpar na ti motorsiklo nga inturong ti helper ti metal works a nangitunda ti ipapatay na.
Nabigbig ti biktima nga inlugan ti van nga agtawen ti 52 a babai, ken residente ti Brgy Barong iti ili ti Dingras, ken ti nakadungpar kenkuana ket ti nakamotorsiklo nga agtawen ti 37, residente met laeng iti nasao a barangay.
Segun iti PNP-Dingras, kabayatan nga agpapa-amyanan a direksyon ti motorsiklo ket nasapgud na ti magmagna a biktima.
Gapu iti daytoy, natulid ti motorsiklo a nagresulta ti panagsagaba ti driver ti sugat iti nagduduma a paset ti bagi na idinto a ti babai ket angalen na ti sakit iti siket ken nagdugol ti ulo na.
Agpada dagitoy a naitaray iti Dingras District Hospital para iti pannakaagas ti sinagaba da a sugat.
Naamoan nga adda ti impluwensya ti nasanger ti nangiturong ti nasao a motorsiklo.
