LAOAG CITY – Napilaanen ti kaso ti inhinyero a naarestar iti entrapment operation iti ili ti Banna gapu iti panagtakaw na ti lugan ken panagikot ti maipagarop nga illegal a drogra.
Segun ken ni P/Cpt. Emerito Mamenta, Chief of Police iti Philippine National Police iti ili ti Banna sumangsango ti suspek iti panagsalungasing ti Article 315 of the Revised Penal Code wenno estafa ken panagsalungasing iti Republic Act 9165 wenno ti Comprehensive Dangerous Drugs Act of 2002.
Maipalagip a basar iti imbestigasion, inlako ti suspek ti tinakaw na a lugan iti biktima iti gatad a 120,000 a pisos, ngem kalpasan ti sumagmamano nga aldaw, nagkiddaw manen ti suspek iti nayun a bayad a 30,000 a pisos iti biktima, ditoy a kiniddaw metten ti biktima dagiti documention ti lugan ket ditoy naamuan na sabali ti nakarehistro a nagan ti nasao a lugan.
Insigida met a nagreport kadagiti otoridad ti biktima ket dita a naammuan a aggapu iti takaw ti lugan nga inlako na.
Kuna ni Mamenta, apaman ti entrapment operation ken pannagisayangkat da ti search and seizure ditoy a nakakumpiskar da ti maysa a sachet ti maipagarop a shabu iti suspek.
Iti agdama ket itultuloy ti PNP Banna ti imbestigasyon tapno maammuan no nabayagen nga isaysayangkat ti suspek a modus operandi ken no karaman daytoy iti drug watch list iti nasao nga ili.
