LAOAG CITY – Kinumpirmaran ni Police Captain Randy Damo, ti chief of police ti Philippine National Police iti ili ti Solsona a naawat dan ti resolusyon manipud iti piskalya seknan iti naipila a kaso a murder kontra kenni Barangay Chairman Rogie Dancel iti Barangay Lipay iti nasao nga ili.
Segun kenni Damo, nailanad iti resolusyon nga attempted homicide ti nagpursige a kaso kontra iti kapitan manippud iti inpila da a kaso a murder.
Inbatad na nga iti agdama ket urayen da pay no anya ti sumaruno nga addang para iti kaso kontra iti kapitan.
Maipalagip a napilaan ti kaso ni Dancel gapo iti panangidanog na ti bato iti rupa ti kaanakan na.
Temporaryo met a nawaya-wayaan ni Dancel kalpasan a nakapagpyansa.
