LAOAG CITY – Agtultuloy pay laeng ti imbestigasyon dagiti otoridad iti napasamak a pammaltog iti Barangay 22, San Cristobal iti ili ti Sarrat.
Segun kenni Police Captain Carlo Abing, chief of police ti PNP-Sarrat, maisagsaganan ti kaso a homicide kontra iti suspek a ni Regie Ganotisi, residente met laeng iti Barangay 22 iti nasao nga ili,
Kunana a basar iti palawag ti suspek ket naginnagaw da ti paltog iti biktima a ni Roliver Bangalan, 38, karpintero, taga Pamplona, Cagayan ken aksidente a nakalbit daytoy rason ti nakatamaan ti barukong ti biktima.
Naamoan a kalpasan daytoy ket maipagarop manen nga innala ti suspek ti paltog ken inputok na iti biktima a rason met ti nakatayan na.
Kinumpirmaran na nga apaman a naipakammo iti pamilya ti biktima ti pasamak ken umay da ditoy probinsya.
Mainaig iti daytoy, ipapaberipikar da idiay camp crame ti paltog nga ikot ti biktima tapno maamoan no kumpleto ti dokumento ti nasao nga armas.
Malaksid iti daytoy, naamoan pay ti PNP-Sarrat a ti biktima ket adda ti warrant of arrest na nga aggapo iti RTC Branch 12 idiay Sanchez Mira gapo iti kaso na a murder.
Innayon ni Abing a saan a daytoy ti ummuna a nagprobokar ti biktima iti balay ti suspek gapo ta iti kallabes ket inaramid na manen daytoy.
