LAOAG CITY – Kinumpirmaran ni Police Executive Master Seargeant Delfin De Leon, Deputy Chief of Police ti Paoay a naggapo idiay ili ti Pagudpud ti van a desgrasya iti Brgy. San Roque, Paoay, Ilocos Norte.
Segun kenni De Leon, ti driver ti van ket ni Michael John Cupcupin, agtawen ti 28 a taga Malabon City ken dagiti 12 a naglugan ket agpapada a taga Metro Manila.
Binigbig na dagiti biktima a da Kristine Nepomozena, Vincent Madrigal, Jamie Madrigal, Cesaryan De Ocampo, Rochele Steioco, Jenifer Medina, Angeline Mendoza, Arnie Montano, Ernie Montano Ermina Ramos, Ron Michael Madrigal, Archie Asio ken Teresita Portugues.
Basar iti imbestigasyon, agturong kuma idiay ciudad ti Vigan dagiti biktima idi napasamak ti aksidente.
Inlawlawag na nga agpaabagatan a direksyon ti van idi agovertake kuma iti maysa a kotse ngem maipagarop nga immovertake met ti nasao a kotse.
Kuna ni De Leon a naitapwak ti van iti kataltalonan a naguneg ti 10 a kadapan kalpasan a napukawan ti kontrol ti driver a nakasugatan dagiti biktima.
Kabayatanna, kuna ni De Leon a masapol kuma nga agparang ti driver ti kotse tapno ipalawag na ti pasamak tapno saan nga agbalin a bias ti imbestigasyon.
Nagtalinaed met iti Mariano Marcos Memorial Hospital and Medical Center idiay ciudad ti Batac dagiti biktima.
