LAOAG CITY – Dead on arrival iti ospital kalpasan a napalto-paltogan ni Sang. Bayan Member Apolonio Medrano iti ili ti Sarrat.
Iti inisyal nga impormasyon ti PNP-Sarrat, nakatakder ni Medrano iti ruwar ti lugan na partikular iti drivers side idi pinalto-paltogan dagiti saan pay a nabigbig a suspek.
Naamoan a nagatendar ni Medrano iti Flag Raising Ceremony idi napasamak ti pammaltog no sadinno ket rumrumuar nga innem a putok ti nangeg.
Ti ayan ti lugan ti konsehal idi napaltogan ket isu ti datin a pagparparkingan na no kada Flag Raising Ceremony iti Lunes.
Rumrumuar nga inuray dagiti suspek ti biktima ken adda da iti likodan ti nagparkingan ti lugan ti konsehal.
Segun met kenni Mr. Redzel Medrano, ti anak ti biktima a konsehal, awan ti ammo na a rason no apay a pinaltogan dagiti suspek ti ama na gapo ta natulong ken nasingpet met daytoy.
Inlawlawag na a nakigtot laengen idi intawag kenkuana dagiti empleado ti Muncipyo a napaltogan ti ama na isut gapo na a dagus a nagturong iti Municipyo.
Inbatad na a nagsasarita da pay laeng iti ama na idi rabii seknan iti panagaramid da ti abong-abong iti karayan ken napagtulagan nga ita nga aldaw ti papan da panagala ti kagamitan kas iti kawayan.
Nagpanawagan met daytoy kadagiti nakakita a makitinnulong ken inpetteng na a nasken a matiliw dagiti suspek.
Kabayatanna, kalpasan ti insidente ket naglibas dagiti suspek idinto a dagus met a naitaray iti maysa a pribado nga ospital ditoy ciudad ti Laoag ti nadakamat nga opisyal.
Karaman kadagiti kitaen ita dagiti otoridad ket ti CCTV a naimuntar iti asideg ti nakapasamakan ti pammaltog.
Agpapan maisursurat ti damag ket awan pay ti narekobre dagiti kameng ti SOCO a kapsula.
