LAOAG CITY – Naragsak nga inpakaammo ni Mr. Pepito Palanggoy a residente iti Barangay Calioet-Libong iti ili ti Bacarra a nasukatanen ti kontador da.
Daytoy ket kalpasan a nagturongen dagiti kameng ti Ilocos Norte Electric Cooperative iti pagtaengan da tapno sukatan daytoy iti oras idi kalman.
Segun kenni Palanggoy, awan iti anyaman a binayadan na iti pannakasukat ti kuntador.
Nagyaman daytoy iti Bombo Radyo Laoag gapo ta kalpasan ti sumagmamano a tawen nga awan ti aksyon ti kooperatiba iti reklamo na ket addan ti solusyon na.
Maipalagip a nagkamang iti Bombo Radyo Laoag ni Palanggoy gapo ta agtultuloy nga adda ti electric bill na iti laksid a naperdi ti kuntador da ken napagtutulagan da a maipatungpal ti flat rate wenno maideklara iti electric bill iti kada bulan a 120 kilowatt-hours (kWh) ti makonsumo na ngem saan a nasursurot.
Nakapungtot met ni INEC Acting General Manager Perry artinez iti naduktalan na ken ibilang na a maysa manen nga anomalya daytoy ken arig na saanen a general manager ti akem na no diket janitor gapo ta isunan ti mangdaldalos iti problema iti napalabas nga administrasyon.
Kunana a rumbeng a maipaayan ti insigida a solusyon gapo ta amin a member consumers ket maapektaran.
Innayon na a dagitoy ket maibilang a takaw a kuryente ken maikabil iti system loss a mainayon a 4% iti kada kilowatt a bayadan ti tunggal member consumer.
