LAOAG CITY – Nakunviktaran ni Jason Corpuz alyas “Puraw”, agtawen ti 26, residente iti Barangay 1, San Lorenzo ditoy ciudad ti Laoag ti maysa a tawen a pannakabalud gapu iti kaso na a theft.
Ti nasao a desisyon ket inparuk-at ni Judge Johnson Valin Padre ti Regional Trial Court Branch 13 ditoy ciudad ti Laoag.
Maipalagip a ti kaso a panagtakaw kontra ken ni alyas Puraw ket napasamak idi Hulyo 29, 2024 no sadinno a sinerrek na ti Provincial Treasury Office iti kapitolyo probinsyal ken naitaray na ti 3,500 a pisos.
Nabigbig ti akusado babaen ti nakamuntar a Closed-circuit television (CCTV) camera iti nasao nga opisina.
Mapapati pay a ti nasao nga akusado metlaeng ti napan nagtakaw iti maysa a pasdek iti paset ti Barangay Balacad ditoy ciudad iti kallabes.
Naamoan nga agdama a nakabalud iti Bureau of Jail Management and Penology (BJMP) ditoy ciudad ti Laoag ti nasao nga akusado.
