LAOAG CITY – Dagus a maipatungpal ti lockdown kadagiti amin a tallo a quarantine faciltity iti ili ti Vintar kalpasan ti panagpositibo iti covid-19 ti maysa nga Overseas Filipino Worker manipod iti United Arab Emirates (UAE) a residente iti Barangay San Nicolas iti nakadamat nga ili.
Ummuna iti daytoy, kinumpirmaran ni Governor Matthew Marcos Manotoc ti kaadda manen ti baro a kaso ti covid-19 ditoy Ilocos Norte, kalpasan ti agarop dua a bulan a panagbalin a covid-19-free ti probinsya.
Inlawlawag na nga itay bigat ket rinugyan da ti pannakabigbig dagiti amin nga immasideg wenno nakapulapol iti maseknan sipud simmangipet iti ili ti Vintar idi Mayo 30.
Segun kenni Mayor Larissa Foronda iti ili ti Vintar, no mabigbig dan dagitoy ket ma-isolate da ken dagiti amin a frontliners iti quarantine failities a nakapulapol ti nagpositibo iti virus ket dumalan iti eksaminasyon.
Karaman kadagiti subject iti testing ket dagiti amin nga agpapay iti RHU, dagiti nangsabat iti border iti ili ti Badoc kas iti PNP, ti kapitan ken dagiti nadanon na iti quarantine facilities.
Gapo iti daytoy, naiget a maipatungpal ti checkpoint tapno awan ti makalusot a sumrek ken rumwar kasta met a maited ti amin a kasapulan dagiti mai-quarantine.
Inbaga ti Mayor a gapo ta awan ti simtomas wenno awan ti marikrikna ti nagpositibo ket saan da nga ikabil iti ospital iti ciudad ti Batac kas panangsurot iti protocol ti Dept. of Health.
Inbatad na pay nga agbirok da ti hotel room ti maseknan a nagpositibo tapno napinpintas ti pannakataming na ken mamonitor a nalaing.
Inpetteng pay ni Foronda a ti kailyan na a nagpositibo iti virus ket saan na a nakaluganan ti nagpositibo a taga Vigan, Ilocos Sur gapo ta angnegatibo ti nakaluganan daytoy.
Pinalagipan met ni Foronda dagiti kailyan na nga obserbaren da ti health protocols kas iti panagusar ti face mask ken panagsurot iti social distancing tapno maliklikan ti panagwaras ti virus, kasta pay dagiti vulnerable kas kadagiti senior citizens ken agtawen ti 20 agpababa.
Ummunan nga inbatad ni Barangay Chairman Teresa Sucab iti Barangay San Nicolas iti ili ti Vintar a kumanunong iti anyaman nga ipatungpal ti LGU ken Municipal Health Office seknan iti daytoy.
