LAOAG CITY – Inbatad ni Police Major Arnel Tabaog, ti chief of police iti ili ti Bacarra a naduktalan da nga awan ti kinapudno na ti immunan a naireport a nagandat a makidnap ti maysa a daycare pupil iti Pasiocan Elemetary School iti nasao nga ili.
Segun ken ni Tabaog, iti pannakisarita dagiti babbai a kameng ti pulisya iti grade 5 pupil ken ti kabsat na a daycare ket inadmitir ti in-inauna nga inaramid na laeng ti palawag na tapno mabutbuteng ti adingna.
Inlawlawag na a basar iti grade 5 pupil ket maistorbo unay gapu ta agtaray-taray ti kabsat na tunggal mapan iti classroom da kabayatan ti panangur-uray na a malpas ti klase da.
Innayon na a napanunot ti grade 5 pupil a butbutngen ti kabsat na tapno agtalna ken saanen a rumwar iti classroom da.
Nupay kasta, kuna ni Tabaog a mabalin a gapu ti kinaganus ti panunot ti grade 5 pupil ket saanna a nautob ti madi nga epekto ti inaramid na.
Gapu iti daytoy, inbalakad na a no adda dagiti maibagbaga a karkarna a pasamak ket masapol nga ireport nga umuna iti nailian a pulisya tapno makaisayangkat da ti imbestigasyon sakbay a maiwaras kangrunaan na iti social media.
Immun-una iti daytoy, inbutaktak ti grade 5 pupil nga adda ti lalaki a nakaabungot ti nangisit a nanggandat a mangkidnap iti in-inaudi a kabsat na iti playground iti uneg a mismo ti pageskwelaan da a nakaalarmaan ti kaadoan ditoy probinsya.
