LAOAG CITY – Sinungbatan ni Mr. Charles Curammeng iti Brgy. Laureta iti ili ti Solsona ti inbatad ni Mayor Joseph De Lara nga awan ti naar-aramidanna.
Segun kenkuana, kabayatan ti panagtugawna kas Kapitan iti nasao a barangay ket pinaraniagna iti paset ti Poblacion gapu iti nasipnget a kalsada babaen kadagiti naipasdek nga street lights.
Inbatadna a saan a dumawdawat ti donasion iti pannakaiyuswat kadagiti aktibidad iti barangayda no diket aggapu mismo iti bulsana.
Inlawlawagna a no kalikagum ni Mayor De Lara ti respeto ket nasken nga ipakitana ti maysa a lider ken panangrespetarna ti padana a tao.
Inpagakna a saanna a masinunuo ti rason dagiti ibagbaga ni Mayor De Lara a pammerperdi kenkuana.
Mainaig iti daytoy, kuna ni Curammeng a mamati isuna nga adda kenkuana ti panagtalek dagiti umili gapu kadagiti maaw-awatna a panagkiddaw ti tulong dagiti tattao.
Innayonna a nakasagana daytoy a mangisubli ti pannakilangen-langen dagiti umili a nagsisina gapu iti maipagarup a panangbutbuteng kadakuada ni Mayor De Lara.
Maipalagip a dinakamat ni Mayor De Lara nga awan ti sumgar a dutdotna iti kalikagum ni Curammeng nga agpaidasig kas Mayor iti ili ti Solsona.
