LAOAG CITY – Kinumpirmaran ni Mr. Albert Rambaod, maysa a negosyante idiay ili ti Paoay nga imported meat dagiti nakumpiskar a pork skin a nakumpiskar da iti maysa a terminal ti bus ditoy ciudad ti Laoag idi kalman a maipagarop nga apektado ti African Swine Fever (ASF).
Segun kenni Rambaod, saan na nga ekspektaren a naikarga laeng iti karton ti order na a produkto gapu ta kadagiti immun-unan a transaksyon da iti importer a ni Mrs. Elizabeth Panganiban ket Styro foam ti nagikargaan na manipod idiay Metro Manila.
Nakigtot laengen ni Rambaod idi inpadanun ti Provincial Veterinary Office iti nasao a banag gapu ta naamoan da nga awan ti umiso a dokumento ti nakumpiskar a produkto.
Inlawlawag na a saan a kanayon nga adda ti transaksyon da kenni Panganiban gapu ta saan met nga isu ti kangrunaan a negosyo na iti aglako ti pork skin, ken ita laeng manen a nagorder gapu kadagiti customer na a nagkiddaw iti daytoy.
Gapu iti daytoy, agsungbat ni Rambaod ken ti importer a ni Panganiban iti sumagmamano a kaso a kas iti panaglabsing ti food safety Act, kaso administrabo, ken dadduma pay.
Nupay kasta, nagpadespensar ni Rambaod kadagiti maseknan gapu ta saan na met ekspektaran a kastoy iti kaipapanan na ti order na a produkto, ken kunana a nagtalkan na laeng ti nasao nga importer.
