LAOAG CITY – Posible a residente iti ili ti Vintar ti adda iti likudan iti naipatulod a bomb threat iti Mariano Marcos State University iti kallabes.
Segun ken ni P/Lt.Col. Adrian Gayuchan, Hepe ti Batac City Police Station, daytoy ti rumrummuar a lokasion ti indibidual a nangipatulod ti bomb threat kas maibasar iti inisyal nga imbestigasion ti Anti-Cybercrime Unit Region 1.
Nupay kasta, inbatadna a saanda pay a makumpirmaran daytoy gapu ta uray isu ti nakailanad a lokasionna ngem ti makita nga IP address iti gadget a nausar ket iti Estados Unidos a mangipaneknek a nalaing ti computer ti maitudtudo a tao.
Inlawlawagna nga agsubli inton bgat dagiti kameng ti Anti-Cybercrime Unit Region 1 iti siudad ti Batac tapno mangiwayat ti sabali pay a bansada iti imbestigasion tapno maammoan ti pakabuklan a detalye iti pakabigbigan ti maseknan nga indibidual.
Kunana a ti kurang laengen tapno maduktalan ti pakabigbgan ti nasao nga indibidual ket petsa ken oras a panangaramidna iti iligal a banag.
Innayonna a no agballigida iti imbestigasion ket dagus a pilaanda ti cybercrime warrant kontra iti suspek.
Maipalagip nga inpakaammo ti Ilocos Norte Police Provincial Ofice nga addan ti Persons of Interest ti Philippine National Police seknan iti napasamak a bomb threat iti Mariano Marcos State University iti siudad ti Batac iti napalabas a tawen.
