LAOAG CITY – Inbatad ni Police Lt. Col. Amador Quiocho, ti chief of police ditoy ciudad ti Laoag nga agtultuloy ti imbestigasyon da mainaig iti napasamak a maipagarop a panagtatakaw iti balay ni dati a congressman Roquito “Roque” Ablan Jr.
Gapu iti napasamak ket napukaw ti motorsiklo ni John Phil-Thai Martin Marcos, agtawen ti 26, baro, residente iti Brgy. Ferdinand iti ili a Marcos, ken agtrabtrabaho iti pamilya Ablan.
Segun ken ni Quiocho, saan a naikkat ni Marcos ti tulbek ti motorsiklo na isut gapuna nga alisto laeng a naitaray ti saan pay a nabigbig a suspek.
Kuna na a saan da met nga ikkatan a possible nga adda laeng ti nangloko ken ni Marcos gapu ta naibati na ti tulbek ti motorsiklo na.
Nupay kasta, inbatad ti opisyal a no pudno man nga adda laeng ti nangloko ken ni Marcos ket maibilang latta a panagtakaw ti napasamak.
Innayon ni Quiocho nga irebisar da a naimbag dagiti CCTV a nakaimuntar iti lawlaw iti balay ti pamilya Ablan tapno maamoan no siasinno ti simrek ken nangitaray ti motorsiklo ni Marcos.
