LAOAG CITY – Inbatad ni Mr. Alex Tagaca iti Barangay 21 iti ili ti Sarrat a saanna nga ammo ti naan-anay a sitwasyon ti kabsat na nga Overseas Filipino Worker idiay Saudi Arabia.
Kuna na a ti naudi a naamoan na maipapan iti kabsat na a ni Catherine Tagaca ket ti panangkumpiskar da iti cellphone na.
Inlawlawag na a ti laengen pangal-alaan da ti update maipapan iti kabsat na ket ti ipost ti inawagan na ti “Bong Cnchia”.
Inpakaammo na pay nga agmessage laeng iti kabsat na no adda ti kasapulan ti kakaisuna nga anak ti nasao nga Overseas Filipino Worker.
Mainaig iti daytoy, inbatad ni Mr. Alex Tagaca nga uray ti immuna nga amo ti kabsat na iti metlaeng nadakamat a pagilyan ket minalmaltrato na daytoy.
Nupay kasta, kuna ni Mr. Tagaca a nakaawid ti kabsat na ditoy pagilian babaen ti tulong ti Overseas Workers Welfare Administration (OWWA).
Immuna iti daytoy, iti post ti Overseas Filipino Worker iti online, agsangsangit daytoy nga umad-adayo kalpasan a dinangran isuna ti amona a lalaki kabayatan nga agtrabtrabaho.
Kagiddan iti daytoy, agpakpakaasi ni Catherine a kalikagumna ti agawiden ditoy Pilipinas iti kabiitan a panawen.
