LAOAG CITY – Inbasura ni Mayor Romulo Acdal iti ili ti Paoay ti ordinansa nga inpasa a dagus dagiti kameng ti konseho.
Ti nasao nga ordinansa ket para iti pannaka-monetize iti kwarta ti leave credits dagiti kwalipikado nga empleado iti LGU-Paoay.
Basar iti nasao nga ordinansa, umab-abot ti nasurok a 2 a milyon a pisos ti nailatang a pondo para iti maited a bayad ti leave credits dagiti kwalipikado nga empleado ken opisyal ti lokal a gobierno iti nasao nga ili.
Inlawlawag ti mayor nga inbasura na ti nasao nga ordinansa gapu ta alisto unay ti pannakaipasa na ken ti pondo a mausar ket dakkel a makatulong para iti pananglaban ti mapaspasaran a covid-19 pandemic.
Inpalagip pay ni Mayor Acdal ti nagbalin a mandar ni Presidente Rodrigo Duterte a masapol nga usaren ti pondo para iti agdama a mapaspasaran a pandemya.
