LAOAG CITY – Ituloy ti Senate Blue Ribbon Committee inton sumaruno a lawas ti imbestigasion mainaig iti maanomalya a flood control projects iti binilyon a pundo ti gobierno.
Inbatad ni Senate President Alan Peter Cayetano a nagtutulagan ti mayorya a mangbukel ti subcommittee a mangtutok ti imbestigasion nga idauloan ni Senador Rodante Marcoleta.
Iti maysa a Facebook livestream idi kalman ket binigbig ni Cayetano a mangrugi ti sesyon inton Hunio 4.
Ti nasao a maanomalya a flood control projects ket nangitunda ti dakkel a tignay protesta a nakaapektar ti ekonomia iti napalabas a tawen.
Ni Marcoleta ti dati a nakatugaw a chair ti Blue Ribbon Committee idi immuna a narugian ti nasao nga imbestigasion kalpasan iti daytoy ket sinukatan daytoy ni Senador Panfilo “Ping’ Lacson a nangidaulo iti sesyon manipud Setiembre iti napan a tawen agingga iti panagsukat ti liderato ti Senado iti napalabas a lawas.
Iti agdama, ni Senadora Pia Cayetano a kabsat ti Senate President ti mangidadaulo iti nasao a komite.
Kabayatanna, nakaiparuk-aten ti komite ti partial report mainaig iti imbestigasion ngem pito laeng a Senador ti nagpirma a kasapulan pay ti siam tapno maiyuli daytoy iti plenario.
