LAOAG CITY – Pinaigetan ti Securities and Exchange Commission (SEC) dagiti requirements iti audit para kadagiti kompanya nga adda ti kontratana iti gobierno iti baet ti napapigsa nga imbestigasion mainaig kadagit kontrobersial a flood control scandal.
Iti salinong ti SEC Memorandum Circular No. 26, Series of 2026, inamyendaran ti regulator dagiti linteg iti akreditasion tapno papigsaen ti kalidad ti pannakatingiting ken masigurado ti umno a financial reporting dagiti contractor.
Gapu iti daytoy, obligadon dagiti kompanya nga addaan ti maymaysa a kontrata iti goierno a dakdakkel ngem P750 million wenno ti pakabukelan a kontratada a nangatngato pay iti P1 billion a naka-secure ti Group A accredited independent external auditor.
Kabayatanna, dagiti kontrata nga agdagup ti P400 million agingga P750 million ket masapoldan a mangala ti Group B auditor tapno makita a nalaing dagiti financial records-da.
Malaksid kadaytoy, impakaammo pay ti korprasion ti pannakaisubmitir ti notarized schedule maipanggep dagiti detalye dagiti proyekto ken status dagiti tunggal proyekto a sakupen ti opisial a rekord ti auditor.
Mangrugi a maipatungpal dagiti baro a pagannurotan ti ahensia kadagiti audit ti financial statement para kadagiti fiscal period nga agleppas inton agtapos ti bulan ti Hunio inton sumaruno a tawen.
