LAOAG CITY – Adda ti maiyus-uswat nga imbestigasyon seknan iti maipagarop a panangtutok ti paltog ni Barangay Jorge Palafox iti Barangay 1, San Francisco iti ili ti San Nicolas iti maysa a negosyante a a nagpabigbig it nagan a John Loiue.
Daytoy ti inpasigurado ni Police Major Joseph Baltazar, chief of police ti PNP-San Nicolas.
Segun kenni Baltazar, ur-urayen da ti beripikasyon no ti paltog a naitutok iti biktima ket lisensyado wenno otorisado nga agusar iti daytoy.
Inpetteng na a no mapaneknekan a naglabsing ti kapitan ket mapilaan ti kaso.
Kunana nga adda met ti CCTV footages a naala da iti nakapasamakan ti insidente.
Malaksid iti daytoy, kunana nga urayen da pay ti affidavit ti biktima tapno maipila ti kaso kontra iti kapitan.
Maipalagip a basar kenni John Loiue, napan da nagatendar iti maysa a dinner meeting kadwa na ti asawa ken anak na, ken idi agawid da ket ditoy a sinada ida ti kapitan kadwa na ti dua a kagawad na.
Dinakamat na a kabayatan ti panagpalawag na no sadinno ti naggapwan da ket maipagarop a kellaat lattan a dinanug ti kapitan, ken idi makita na nga adda ti kakauten ni Palafox iti sling bag na ket nagsanud gapu ta agamak amangan no mairaman dagiti agina na.
Inbatad ni John Louie nga idi naasot ti kapitan ti paltog na ket intutuk na pay kenkuana.
Nakaanges laeng ni John Louie idi dimteng dagiti pulis a tinawagan ti pagayam na.
Mainaig iti daytoy, naglikudan ti negosyante ti alegasyon ni Palafox nga iningaran na daytoy gapu ta nababa ken nadayaw ti pannakisarita na iti kapitan.
