LAOAG CITY – Inpetteng ni Mr. Amor Caridad nga awan iti kinapudnona ti inbatad ni Mr. Expedito Dela Cruz maipanggep iti daga a nakaipatakderan iti pamiliada a masarakan iti Brgy. 60-B, Madiladig ditoy siudad ti Laoag.
Inlawlawagna a ti nasao a daga ket insalda ti maysa nga indibidual nga agapilyedo ti Andres iti lolona.
Kunana a daytoy a saritaaan ket napasamak babaen iti panagpinnirmada iti maysa a katulagan a naaramid idi pay laeng Hulio 1923 no sadino nailanad ditoy iti surat nga insalda ti akinbagi ti daga iti gatad a 2,575 a pisos iti lolona.
Inpalgakna a kalpasan iti daytoy ket nagturungen ti pamilia Andres idiay Mindanao ken saanen a nagsubli pay ditoy Ilocos Norte.
Gapu iti daytoy, mamati nga isu metten ti rason no apay a nangipatakder ti lolona iti pagtaengan iti nasao a daga agingga iti agdama.
Inpakaammona nga awan ti kinapudnona ti inbaga ni Dela Cruz gapu ta saanna pay maibaga no kasanona a nagbalin a kabagian ti akinbagi iti daga no sadino inpetteng ti anak ti akindaga a saanna am-ammo ni Dela Cruz.
Innayonna a nabayagen nga isuda ti agbaybayad ti amiliar ken namin-adu a daras dagitoyen a nagsasarita iti barangay ngem saanna kayat nga awaten iti kinapudnona maipapan iti nasao a daga.
Kabayatanna, inkalintegan ni Caridad nga uray ania ti mapasamak ket agtalinaedda iti nasao a lugar gapu ta mamatida nga addada iti umiso a pagtaktakderan.
