LAOAG CITY – Awan pay ti mapanunot dagiti pamilia ti dua a lallaki a napaltu-paltogan a puon ti nakatayanda iti Barangay Paltit iti ili ti Badoc a mabalin nga adda iti likudan ti insidente.
Nabigbig dagiti biktima nga isuda Erwin Rondal a residente ti Barangay Napu iti ili ti Badoc ken James Fernandez a residente ti Barangay Bulbulala iti ili ti Pinili.
Iti panagturong ti Bombo Radyo Laoag News Team iti pagtaengan ni Fernandez, segun iti dati a live-in partner daytoy a ni alyas Lenie, awan ti ammona a rason iti pannakapapatay ni Fernandez nangruna ket awan met ti dakdakametanna kenkuana nga aniaman a problema, pammutbuteng wenno pangta iti biagna.
Inladawanna a nasayaat ken nasingpet ti dati a live-in partner daytoy aglalo ket awan ti naalas a rekord wenno kasona iti kallabes.
Saanna met nga inlibak nga adda dagiti gundaway a mapan makipallot ti dati a live-in partner daytoy kadagiti nagduduma a lugar iti uneg ken ruar ditoy probinsia.
Mainaig iti daytoy, nagkedked pay laeng a mangipaay ti komento ti agdama a live-in partner ni Fernandez a maysa a bulan pay laeng nga agdendennada.
Nupay kasta, inpakaammo ti kabsat ni Fernandez nga inaldaw nga agawid iti family house-da ngem kadagiti dua nga aldaw a naglabas ket saan daytoy a nagpakpakita kadakuada iti saan a masinunuo a rason.
Malaksid iti daytoy, nagturong pay ti Bombo Radyo Laoag News Team iti pagtaengan ni Rondal ngem awan ti asawana gapu ta nagturong iti funeraria idinto a ti anakna ket adda idiay Vigan City, Ilocos Sur.
Naammoan a ni Rondal ket makumikom iti panagtaraken kadagiti manok no sadinno nga ilabanna dagitoy para iti pallot.
Maipalagip a kabayatan a dumaldalyasat dagiti biktima a nakalugan ti SUV nga agturong nga agpa-amianan ket kellaat lattan a pinaltu-paltogan dagiti saan pay a nabigbig a suspek a sumarsaruno kadakuada a nakalugan ti maysa nga Innova nga agmaris ti puraw ken maysa a pick-up nga agmaris ti nangisit.
Immuna iti daytoy, adda ti sumurok 30 a basyo ti bala ti narekobre dagiti otoridad iti nakapasamakan ti krimen ngem saan pay a masinunuo no ania a klase ti paltog ti inusar dagiti suspek.
