LAOAG CITY – Winaya-wayaanen ti Philippine National Police (PNP) iti ili ti San Nicolas ni Mr. Joseph Jalos iti Brgy. 11, Sta. Rosa iti ili ti Sarrat ken driver ti crane a nangbagkat iti lusob a nangpandag iti construction worker a ni Mr. Nestor Duldulao, residente iti Barangay 3 iti nasao nga ili.
Daytoy ket kalpasan a saanen nga ipursige ti pamilya ni Duldulao ti agpila ti reklamo kontra ken ni Jalos.
Inbatad ti PNP a kumbinsido ti pamilya ni Duldulao nga aksidente ti napasamak ken saan a nagayatan wenno inranta ni Jalos.
Naamoan a kiniddaw laengen ti pamilya Duldulao a tumulong ni Jalos iti magastos da para iti pannakaimansayag agingga iti pannakaitabon ti biktima.
Maipalagip a kabayatan ti panangiyakar da Jalos ti lusob manipud iti nakaikargaan na a truck ket timmayek daytoy rason a naikkat ti lock na.
Immunan nga inbatad ni Jalos a saan a dagus a napan ti lusob iti kanal no di ket nagpaigid pay laeng kalpasan na ket nagtulidtid a napan iti kanal nga ayan ti dua a construction workers a pakairamanan ni Duldulao.
Gapu iti daytoy, nagpukkaw ni Jalos tapno umadayo dagiti dua a construction workers iti kanal no sadinno a nakataray ti maysa idinto a ni Duldulao ket binuybuya na lattan agingga a napandagan ti lusob.
Nagsagaba ni Duldulao iti nakana a sugat iti pannakapandag na iti lusob a nagresultan ti pannakatay na.
