LAOAG CITY – Inrakurak ni Bombo International News Correspondent Denmark Suede iti Australia a possible nga ad-adda manen a paigetan ti nadakamat a pagilian ti panagikot ti paltog dagiti residente kalpasan ti napasamak a pammaltog iti Bondi Beach a nakatayan ti 15 a tattao.
Kuna na a malaksid kadagiti natay ket adda pay ti agarop 27 a sabsabali dagiti nasugatan a naitaray iti nagduduma nga ospital no sadinno nga innem kadagitoy ket kritikal ti kondisyon da.
Inbatad ni Suede a saan a dagus a napanunot dagiti tattao no ania dagiti timmama kadagiti biktima gapu ta saan da a narwam a makakitkita ti paltog.
Innayon na nga iti uneg ti 19 a tawen nga agserserbi iti ospital idiay Australia ket saan pay a nakakita iti nagbalin a biktima ti pammaltog.
Inpalagip ni Suede a napaigetan ti panagikot ti paltog idiay Australia, addan 29 a tawen ti napalabas kalpasan a nagpalto-paltog ti maysa nga indibidual iti maysa nga estado iti pagilian a nakatayan ti 35 a tattao ken nakasugatan ti 23 a sabsabali pay.
Sipud idi ket narigaten ti makaala ti lisensya para iti panagikot ti paltog no sadinno a saanda nga ipalubos no ti laeng rason ket self-defense.
Inpakaammo na pay a dagiti maipaayan ti lisensya ket masapol nga isuda laeng ti makaammo iti padlock ti pangiduldulinan da ti paltog.
Iti agdama, kuna ni Suede a saan pay a nangiparuk-at dagiti otoridad iti impormasyon no ania ti motibo dagiti agama a suspek iti napasamak a krimen.
