LAOAG CITY – Umaboten iti nasurok 40 a tattao ti natay ken umaboten iti minilyon ti naawanan ti kuryente iti iduduprak ti Bagyo a Helene iti abagatan a daya ti Estados Unidos.
Gapu iti daytoy ket agtultuloy ti panagibakwit dagiti opisyal no sadinno nga agus-usar da iti bangka, helikopter ken dadakkel a lugan tapno matulongan dagiti na-stranded gapu iti nakaru a layus, agraman ti agarup 50 a trabahador ken pasiente a nagdudupudop kadagiti atep dagiti ospital.
Basar kadagiti otoridad, daytoy ti maibilang ti kapigsaan a bagyo a nairekord a dimmuprak iti Big Bend ti Florida ken nagturong iti amianan a paset ti Georgia ken Carolinas kalpasan a nagland fall daytoy.
Kuna dagiti insurers ken financial institutions a mabalin nga umabot iti binilion a doliar ti agbalin a balor dagiti madadael gapu iti bagyo.
Inpasigurado met ti Federal Emergency Management Agency (FEMA) nga itultuloy da ti monitoring iti lugarda.
