LAOAG CITY – Inpakaammo ni Barangay Chairman Dromar Orcia ti Barangay Corocor iti ili ti Bacarra a naipadanonen iti maseknan a telecommunications company maipanggep iti matumtumba a poste.
Inbatadna a naiget ti pannakikoordinarna iti nadakamat a telecommunications company tapno insigida daytoy a maiplastar.
Inlawlawagna a narisgo no mabaybay-an ken maibaybayag ti matumtumba a poste nangruna ket adu dagiti motorista a dumaldalyasat iti nasao a kalsada.
Kunana a posible nga addan ti tallo nga aldaw a matumtumba ti poste gapu iti napasaran a napigsa a tudo ken angin.
Innayonna a mangnamnama daytoy a masolbar iti kabiitan a panawen tapno maliklikan nga adda ti mapasamak a desgrasia.
Maipalagip nga adda dagiti sumagmamano a motorista ti agamak gapu iti matumtumba a poste a posible a mangitunda ti desgrasia.
