LAOAG CITY – Inbatad ni Police Lt. Col. Rafael Lero, ti chief of police ditoy ciudad ti Laoag nga isagsagana dan ti ipila da a reklamo a murder kontra kadagiti agkabsat a maitudtudo a nangkabkabil a poon ti nakatayan ni Reymark Alcantara, agtawen ti 19, residente iti Barangay 34-B, Gabu ditoy ciudad, ngem napasamak ti insidente iti Barangay Cavit.
Immunan a binigbig ti ina ti biktima dagiti dua a nakita na a nangkabkabil iti anak na nga isuda Ronald Jacinto ken Severino Jacinto, agpada a residente iti Barangay Cavit ditoy ciudad.
Inbaga ni Lero a ti laengen ur-urayen da ket ti death certificate ti biktima tapno maipila da ti reklamo iti piskalya.
Inlawlawag na a murder ti ipila da a reklamo gapu ta basar iti assessment dagiti imbestigador da ket nakita da a naplano ti panangpatay dagiti suspek iti nasao a biktima.
Malaksid iti ina ti biktima ket adda pay ti testigo da nga opisyal iti Barangay Gabu a nangipaneknek nga innem amin dagiti suspek ken nakaimatang iti insidente.
Inpakaammo ni Lero nga agtultuloy pay laeng ti imbestigasyon da tapno mabigbig ti kinatao dagiti uppat a kakadwa dagiti agkabsat nga Jacinto.
Innayon na pay a ti nadadael a paset ti tricycle a nagluganan ti biktima ket nagmatch ti markings ti kurung-kurong a naala da iti posisyon ti maysa kadagiti suspek babaen iti inyuswat da a reenactment.
Immun-una iti daytoy, naamoan a pabpabasolen dagiti suspek ti biktima a nangdadael kadagiti fish cages da.
