LAOAG CITY – Naiwayat ti sabali manen a search and rescue operation iti ili ti Currimao ken Pasuquin iti mapukpukaw a menor de edad iti beach resort iti Barangay Calayab ditoy siudad ti Laoag.
Nupay kasta, inbatad ni Dr. Melvin Manuel, mangidadaulo ti City Disaster Risk Reduction and Management Office a saan pay a nabirukan ti nasao a menor de edad kabayatan a maisursurat daytoy a damag.
Kunana a kaduada ti Bureau of Fire Protection ken Philippine Coast Guard iti pannakaiwayat ti search and rescue operation.
Inlawlawagna a nakasaritana ti nagannak ti menor de edad nga inpanamnamana kadakuada nga aramidenda ti amin a kabaelanda tapno mabirukan daytoy iti kabiitan a panawen.
Maipalagip a nagpakada ti menor de edad a napan nagbisbisikleta kaduana dagiti tallo a papagayamna ken idi nakadanonda iti lugar ket napan timmapog ti biktima iti baybay ngem saanen a timmakdang.
