LAOAG CITY – Inpakaammo ni P/Cpt. Elison Pasamonte, Hepe ti Badoc Municipal Police Station nga adda ti sumurok-kumurang 80 a basyo ti bala ti narekobre dagiti otoridad kalpasan a napaltu-paltogan ti dua a lallaki iti Barangay Paltit iti ili ti Badoc.
Segun kenkuana, dagiti nausar a paltog iti insidente ket ti calibre .56 ken calibre .30.
Inbatadna a manarimaan ti pannakisarsaritada kadagiti residente iti lugar a mabalin a makaipaay ti naan-anay nga impormasion maipanggep iti krimen.
Kunana a manarimaan pay ti panangalada kadagiti Close Circuit Television wenno CCTV footages tapno ad-adda a makaitudo kadagiti adda iti likudan ti insidente.
Inlawlawagna a saan pay laeng a makaipaay ti detalye mainaig iti naan-anay a pakabigbigan dagiti suspek kasta pay ti pakabigbigan dagiti biktima kas panangrespetar iti pamiliada.
Nupay kasta, inpetteng ni P/Cpt. Pasamonte a basar iti imbestigasionda ket inipit dagiti suspek ti nagluganan dagiti biktima kagiddan iti panangpaltu-paltogda kadakuada.
Inpaganetgetna nga awan pay ti mangipaneknek no aggapu iti galyeraan dagiti biktima sakbay ti napasamak a pammaltog.
Innayonna a narekobre dagiti otoridad iti uneg ti lugan dagiti biktima ti maysa a calibre .56 ken dua a pistol.
Kabayatanna, naiget nga im-imbestigaran pay laeng ti Badoc Municipal Police Station no adda ti pakainaigan iti pannakipallot dagiti biktima iti napasamak kadakuada.
Maipalagip a kabayatan a dumaldalyasat dagiti biktima nga isuda Erwin Rondal a residente ti Barangay Napu iti ili ti Badoc ken James Fernandez a residente ti Barangay Bulbulala iti ili ti Pinili a nakalugan ti kotse nga agturong nga agpa-amianan ket kellaat lattan a pinaltu-paltogan dagiti saan pay a nabigbig a suspek a sumarsaruno kadakuada a nakalugan ti maysa nga Innova nga agmaris ti puraw ken maysa a pick-up nga agmaris ti nangisit.
