LAOAG CITY – Napilaanen ti kaso a robbery ti suspek a nangserrek iti maysa a tianggi iti Barangay 15, Suba iti ili ti Paoay.
Nabigbig ti agtagikua iti tianggi a ni Irene Carinugan y Padayao, agtawen ti 66, balo idinto a ti suspek ket ni Christopher Bale y Padayao, agtawen ti 37, awanan ti asawa ken agpada dagitoy a residente iti nadakamat a barangay.
Inbatad ni Police Capt.Jackson Sugayen, ti chief of police iti ilit Paoay, kalpasan a naipila da ti kaso babaen iti inquest proceeding ket ginundawayan ti suspek ti preliminary investigation.
Gapu iti daytoy, kuna ni Sugayen a naipaayan ti 10 nga aldaw ti suspek tapno mangisumitir ti counter affidavit na no sadinno nga isunto metten ti panangiparuk-at ti desisyon ti korte no maipisuk ti suspek iti pagbaludan.
Immunan a napan nagreport ni Carinugan iti Philippine National Police kalpasan a naduktalan na a mapukpukaw ti kwarta iti tianggi na nga agdagop ti 62, 500 a pisos.
Inbatad ti biktima nga iti panangrebisar ti anakna a lalaki iti CCTV wenno closed-circuit television camera iti tianggi da ket ditoy a nabigbig da ti nasao a suspek.
