LAOAG CITY – Inpakaammo ni Police Capt. Roi Manuel Ordonio, ti chief of police iti ili ti Marcos a possible a kaso a parricide ti ipila da kontra iti suspek a ni Joel Pasion Mateo, agtawen ti 44, naasawaan, mannalon gapu iti panangbagko-bagkong na iti ama na a ni Mr. Pedro Tolentino Mateo, agtawen ti 79, naasawaan, mannalon, agpada a residente iti Barangay Tabucbuc iti ili ti Marcos.
Kuna ni Ordonio nga umabot iti agarop 10 a bagkong ti sinagaba ti biktima a kaadoan ket barukong ken buksit a nangitunda iti pannakatay na.
Inlawlawag ni Ordonio a dudua laeng dagiti agama nga adda iti balayda idi adda ti napasamak a komosyon ken nabara nga argumento iti nagbaetan da gapu ta ti asawa ti biktima nga stepmother ti suspek ket adda iti ili ti San Nicolas.
Segun pay ken ni Ordonio, datin nga adda ti susik dagiti agama ken adda ti problema iti pamilya da isut gapuna a tunggal makainom da ket agriri dagitoy.
Mainaig iti daytoy, kuna ti opisyal a basar kadagiti kakabsat ti suspek ket nauyong ti ama da isut gapuna a ti koma laengen inaramid ti kabsat da ket pinanawan nan idi agriri da tapno saan koma a napasamak ti nasao a krimen.
Gapu iti napasamak, pursigido dagiti kakabsat ti suspek nga agpila ti reklamo gapu iti panangpatay na iti ama da.
Kabayatanna, kuna ni Ordonio nga inpetteng ti suspek a ti ama na ti nakainom ti nasanger idi napasamak ti krimen.
Naamoan nga agarop pito a pulgada ti kaatiddog ti kutsilyo nga inusar ti suspek iti panangbagko-bagkong na iti bukod na nga ama.
Innayon ni Ordonio a basar iti pannakaeksamen ti biktima ket addan ti 10 agingga iti 12 nga oras a pimmusay idi napan nagresponde dagiti otoridad kadwa da dagiti kameng ti Rural Health Unit iti nadakamat nga ili.
Iti agdama, nagtalinaed ti suspek iti Philippine National Police iti ili ti Marcos bayat a maisagsagana ti reklamo a maipila kontra kenkuana.
