LAOAG CITY – Napaltogan ti namindua a daras ti suspek iti naiwayat nga Anti-Illegal Drug Buy-bust Operation iti ili ti San Nicolas a ni Jay Ar Cabigun, agtawen iti 30, driver, residente iti Barangay 16 iti nasao nga ili ken tubo idiay Mindanao.
Segun ken ni P/Maj. Eduardo Santos, Hepe ti San Nicolas Municipal Police Station, daytoy ket kalpasan a limmaban kadagiti pulis a nangiwayat iti nadakamat nga operasion.
Inbatadna a dagus a nagpaputok ti paltog dagiti maseknan a pulis kalpasan a bimmunot ti suspek ti calibre 45 a paltog ken nagusar ti immuko.
Gapu iti daytoy, inpalgakna a natamaan ti suspek iti paset ti ima ken barukongna.
Kunana a nagtalinaed pay laeng iti ospital ti suspek ken banbantayan isuna dagiti pulis.
Mainaig iti daytoy, inpakaammo ni P/Maj. Santos nga adda iti Crime Laboratory idiay Ilocos Sur ti live in partner ti suspek a ni Marietta Alfonso Barioga a natiliw met iti operasion no sadinno dimmalan daytoy iti drug test ken maiyur-uray pay laeng ti resultana.
Innayonna a sumurok-kumurang maysa a gramo ti kadagsen ti maatap a shabu a naala manipud iti suspek.
Naammoan a maibilang ti suspek kas Street Level Individual ken addan ti maysa a bulan a monmonitorenda isuna.
Maipalagip a naglemmeng pay ti suspek iti uneg ti CR no sadinno a rinakrak dagiti kameng ti otoridad ti ridaw ti naglemmenganna.
