LAOAG CITY – Inbatad ni Police Major Paul Benedict Parado, ti chief of police iti ili a San Nicolas a manamnama nga ipila da ti kaso a murder babaen ti regular filing kontra ken ni alyas “Tisoy” a suspek iti nakaam-ames a pannakapapatay ni Juvilyn Bardiaga, Assistant Manager ti dakkel a grocery store iti ili a San Nicolas.
Iti press conference nga insayangkat ni Parado, inbatad na a ti suspek ket agpapaay kas maintenance ti nasao a kompanya ken daytoy ket maiyakar-akar ti nagduduma a branch da.
Inpakaammo na a basar iti dokumento ti suspek ket saan a taga Ilocos Norte ngem ado dagiti residensya na, karaman ditoy ti Iloilo, Caloocan, Bataan ken Cagayan.
Kuna na a basar ti monitor da ket nagturong ti suspek idiay Cagayan idi kalman.
Segun kenkuana, ti kitkitaen da a motibo iti krimen ket maipanggep ti problema iti trabaho ken madlaw a nakaro ti gura ti suspek gapu ti wagas a panangpatay na ti nasao a biktima.
Kabayatanna, inbatad ni Parado nga awan ti napasamak a panagtakaw iti pannakapapatay ni Badriaga gapu ta awan pulos ti napukaw kadagiti kagamitan na.
Innayon na nga awan pay ti pagibasaran a narames daytoy ngem saanda a mailawlawag no apay a silalamo idi mabirukan ti bangkay na iti uneg a mismo ti apartment na iti Barangay 2 iti ili a San Nicolas.
Inpakaammo na a possible a mangisayangkat pay ti sabali a press conference tapno idasar da dagiti ebidensya kontra ti saanna pay laeng nga innaganan a suspek.
