LAOAG CITY – Mapilaan ti agsusukot a kaso ti suspek iti pammagkong iti Barangay 55-A Barit ditoy siudad ti Laoag.
Sumango ti suspek a ni Sonny Dominic Bonoan, agtawen ti 45 ken residente ti Barangay 1 Sta. Rita iti ili ti Bacarra iti kaso a Murder, panaglabsing iti Republic Act No. 9165 wenno ti Comprehensive Dangerous Drugs Act of 2002 ken Republic Act No. 10591 wenno ti Comprehensive Firearms and Ammunition Regulation Act.
Basar iti Laoag City Police Station, nakumpiskar iti motorsiklo ti suspek ti dua a pedaso nga heat sealed transparent plastic sachet a naglaon ti maatap a shabu ken dua a pedaso ti bala ti calibre 22.
Maipalagip a natay ti biktima a ni Rando Barut Ramos Jr., agtawen ti 30 ken residente ti Barangay 2 iti ili ti Bacarra kalpasan a binagkong isuna ti suspek iti namin-adu a daras iti nagduduma a paset ti bagina.
Immuna iti daytoy, binagkong pay ti suspek dagiti agina nga isuda Aiza Czarina Razote, agtawen ti 35 ken ni Reneizance Razote, agtawen ti 20 nga agpada a residente ti Barangay 55-A Barit ditoy siudad ti Laoag.
Iti agdama, agtultuloy nga agpapaimbag dagiti agina iti ospital gapu iti sinagabada a sugat iti nagduduma a paset ti bagida.
Naammoan a dati a boyfriend ni Aiza ti suspek a kayatna a makisinnublianan kenkuana ngem saanna a kayat gapu ta dangdangranna isuna idi agdendennada.
Kabayatanna, rumrummuar nga imon ti rason iti panangbagko-bagkong ti suspek kadagiti biktima.
