LAOAG CITY – Positibo ti resulta ti drug test ni Leo T. Vicente, agtawen ti 37, naasawaan, truck driver ken residente iti Barangay Saludares iti ili ti Dingras.
Ni Vicente ket natiliw iti drug buy-bust operation a naiyuswat iti Barangay Tamdagan iti ili ti Vintar.
Inbatad ni Police Capt Roy Manuel Ordonio, ti chief of police iti ili ti Vintar a malaksid iti panagpositibo iti drug test ni Vicente ket nagpositibo pay dagiti naala nga illegal a droga iti ikotna nga agdagsen ti 4.7 a gramo.
Napilaan metten ni Vicente ti kaso a panaglabsing iti Republic Act 9165 wenno Comprehensive Dangerous Drugs Act of 2002.
Inpakaammo ni Ordonio a naipisuken iti Ilocos Norte Provincial Jail (INPJ) ni Vicente.
Maipalagip a kinemmeg a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu iti maysa a pulis a nagpammarang kas poseur-buyer.
Iti pannakakapkap ti suspek ket naala pay iti ikotna ti 5 a sachet a naglaon metlaeng ti maipagarop a shabu, sangaribo a pisos a nausar iti operasyon, maysa a kaha ti sigarilyo karaman ti pitaka na nga ayan ti sumagmamano nga Identification Card na ken ti cash a 10,550 a pisos.
Kabayatanna, iti interview ti Bombo Radyo Laoag iti suspek ket inadmitir na nga agus-usar ti illegal a droga kangrunaan na no agovertime da iti trabaho na ngem saan nga aglaklako.
