LAOAG CITY – Nabirokanen ti bangkay ti ubing a nalmes iti dam iti Brgy. Dariwdiw, iti siudad ti Batac itay leppas ti pangaladaw.
Segun kenni Police Major Artemio Clemente, officer in charge iti PNP Batac, pasado alas-dose y media idi nabirokan ti bangkay ti ubing nga agtawen ti 10.
Kuna na a nasurok tallo a katao ti kauneg ti nakalmesan ti biktima ken nagsagaba ti sugat iti bagi na.
Dagus a naipan iti punenarya ti bangkay ti ubing kalpasan a naisangat dagiti kameng ti BFP, CDRRMO, ken Coast Guard.
Maipalagip a nagturong dagiti aggaama iti nasao a lugar kalpasan ti panagiwarwar da dagiti dingwen iti bantay.
Nagdigos dagiti uppat nga agkakabsat idinto a ti biktima ket nagpatapaw iti kawayan.
Maipagarup a nakaibbat ti biktima iti kawayan a nangitunda pannakalmes na.
