LAOAG CITY – Umaboten iti 81 a barangay ti naireport a kangrunaan a naapektaran iti idadayyeg ti napigsa a gingined ditoy probinsya idi rabii ti martes.
Daytoy ti inreport ni Mrs. Lilian Rin iti Provincial Social Welfare and Development (PSWD) kabayatan ti press conference a naiyuswat iti kapitolyo probinsyal nga indaulwan ni Governor Matthew Marcos-Manotoc idi kalman.
Basar ken ni Rin, adda metten ti naireport nga 406 a pamilya ken 1, 456 nga indibidual ti naapektaran iti napigsa a gingined.
Kabayatanna, umabot ti 8 a balay ti totally damaged idinto a 387 ti partially damaged.
Mainaig iti daytoy, inpakaammo ni Rin nga adda pay ti sumagmamano nga ili a saan a nakaisumitir ti report na mainaig kadagiti perdisyon iti masakupan da a lugar nga inbati ti napigsa a panagdayyeg.
