LAOAG CITY – Manamnama nga ita a lawas a maiturn-over dagiti uppat a lallaki iti Bureau of Corrections (BuCor) manipud ditoy probinsya a nawaya-wayaan babaen ti Good Conduct Time Allowance (GCTA) Law.
Daytoy ti kinumpiramran ni Police Col. Cesar Pasiwen, Provincial Director ti Ilocos Norte Police Provincial Office (INPPO).
Nabigbig dagitoy a da Artemio Medina y Martinez, 63, naasawaan, residente ti Brgy. Abaca iti ili a Bangui; Roly Tabieros y Malda, 53, naasawaan, residente ti Brgy. Saud iti ili a Pagudpud, ken dagiti agama iti ili ti Sarrat a da Samuel Baoit ken ti anak na a ni Brendi Baoit, agpada a nakunbiktaran ti kaso a murder.
Segun kenni Pasiwen, nakasagana dagiti pulis a mang-escort kadagiti uppat a lallaki anyaman nga aldaw nga ikeddeng ti higher office ti PNP a pannakaibyahe da.
Kunana a kumpleto dagiti dokumentos dagiti nasao nga uppat a dati a balod.
Inlawlawag na a dagiti agama a Baoit ket adda ti nagan da iti GCTA kontra iti ipet-petteng dagiti maseknan a nawaya-wayaan da babaen ti parole and provisions.
Maipalagip a nangted ti ultimatum ni Presidente Rodrigo Duterte kadagiti 2,000 GCTA beneficiaries a sumuko kadagiti otoridad tapno dumalan ti re-evaluation ken re-computation.
