LAOAG CITY – Inpetteng ni Vice Mayor Jonathan de Lara iti ili ti Solsona a saan a pangta ti nagwaras iti social media ken uray iti text messages nga adda ti bomba iti nakaisayangkatan ti aktibidad para iti pananglukat da manen ti turismo iti nasao nga ili.
Inpalgak na a kayat laeng dagiti nagiwaras nga adda ti bomba iti pakaisayangkatan ti aktibidad a saan nga agprogreso iti ili ti Solsona.
Kuna ti bise mayor a no kayat a bombaen ti maysa a lugar ket saanen a kasapulan nga ipublikar nga umuna wenno iwaras iti social media ken babaen iti text messages.
Innayon na a mabalin nga adda pay ti maris pulitika ti napasamak gapu ta patien na a dagiti nagaramid iti daytoy ket kayat na a dadaelen ti pinagtalkan dagiti tattao iti nasao nga ili.
Inpakaammo ti bise mayor nga iti baet ti napasamak ket ibilang da latta a nagballigi dagiti inyuswat da nga aktibidad no sadinno a dagiti laeng estudyante ti saanen a napan nakipartisipar pay.
Immun-una iti daytoy, kinumpirmaran ni Police Captain Belen Baoit, ti chief of police ti PNP-Solsona nga adda ti naawat a pangta iti biag ni Mayor Joseph de Lara ken dadduma nga opisyales iti nadakamat nga ili.
Segun kenni Baoit, adda pay ti naawat a bomb threat iti pakaisaysayangakatan dagiti nagduduma nga aktibidad iti Solsona.
Gapo iti daytoy, kunana a naiget ti panagmonitor da ken ipapaay da a seguridad kangrunaan na kadagiti paset iti ili a pakaiyuswatan ti aktibidad.
Mangnamnama ti hepe nga iti laksid nga adda dagiti pangta a maaw-awat ket mapagtalinaed da ti linak ken talna.
Mainaig iti daytoy, ibilang ni De Lara a daytoy ket tapno maperdi ti administrasyon ngem masapol latta ti panagannad dagitoy.
