LAOAG CITY – Napilaanen ti kaso a panaglabsing iti Republic Act No. 9165 wenno ti Comprehensive Dangerous Drugs Act of 2002 ti welder a naalaan ti sumurok-kumurang 300 a gramo ti maipagarup a shabu nga agbalor ti P2,040,000.00 iti Barangay 3, San Baltazar iti ili ti San Nicolas.
Binigbig ni P/Capt. Randy Damo, ti chief of police iti ili ti San Nicolas, ti suspek a ni Donden Mark Antonio, agtawen ti 31, awanan asawa ken residente ti Barangay Root iti ili ti Dingras.
Immunan nga inbatad ni Damo a maibilang nga Street Level Individual ti suspek ngem gapu iti kaadu ti nakumpiskar a droga manipud kenkuana ket ibilangda daytoyen kas High Value Individual.
Mainaig iti daytoy, inadmitir ti suspek a napilitan laeng a nagbalin kas drug courier gapu iti kinarigat ti panagbiag, no sadinno a nabayagen a nagsina da iti asawa na ken isuna ti mangpab-pabasa kadagiti tallo nga annak na.
Inlawlawag na nga idi laeng domingo ket adda ti nangbaon kenkuana a mapan idiay Metro Manila tapno adda ti mapanna alaen a parcel, ngem adda ti nangtawag kenkuana a mapanna alaen iti Calamba, Laguna.
Inbutaktak na a malaksid iti nangbaon kenkuana a taga Dingras metlaeng, ket adda pay ti nangatngato a tao a mangibabaon met iti mangbabaon kenkuna.
Kuna na a mapan koma pay makipagkita iti maysa a babai iti Marikina ngem gapu ta adda ti bitbit na a parcel ken nagtudo ket inpilit na lattan ti nagawid ditoy probinsya.
Nupay kasta, apaman a nakadissaag iti sango ti convenience store iti ili ti San Nicolas ket adda metten dagiti bigla a nangarestar kenkuana.
Inpaganetget na a saanna nga ammo ti linaon ti parcel gapu ta saanna a mabalin a lukatan, ngem adda ti panagdudua na gapu iti kinangina daytoy nga umabot iti 120 ribo a pisos ti bayadna.
Kabayatanna, inadmitir na pay nga adda dagiti gundaway nga aglako ken agusar iti illegal a droga.
Innayon na a pudno a kanayun a maud-udi ti panagbabawi isut gapuna nga awanen ti mabalin na iti pannakaarestar na.
Iti agdama, nagtalinaed ti suspek iti Philippine National Police iti ili ti San Nicolas.
