LAOAG CITY – Kinumpirmaran ni Barangay Kagawad Delson Diego iti Barangay Lagui-Sail ditoy ciudad ti Laoag nga adda ti uppat a pimmusay a baboy ken naikali iti Sitio Sail.
Segun kenni Diego, idi Setyembre 1 ket naistorya ti agtagikua kadagiti baboy a natay ti maysa a burias ken inbalakad na a paliiwen da amangan no gagangay laeng ti rason a pimmusay daytoy.
Nupay kasta, iti kabigatan na ket naduktalan da a saan a mangan ti maysa a pangganakan ken kalpasan ti sumagmamano nga oras ket natay daytoy ken in-inot a natay dagiti dadduma.
Gapo iti pannakaalarma da ket intawag da a dagus kenni Dr. Arthur Cabello, ti City Veterinarian ken nangala da ti sample dagiti baboy ken dumalan iti eksaminasyon tapno maamoan no positibo wenno saan iti African Swine Fever (ASF).
Kunana nga inbalakad ni Cabello nga awan ti mairuar a baboy a sakop ti 500-meter radius daytoy agingga a maamoan ti resulta.
Mainaig iti daytoy, inbatad ni Diego nga iti met laeng lote ti hog raiser ti nagikalyan da kadagiti natay a baboy.
Malaksid iti daytoy, kunana nga adda ti naipadanon kenkuana itay bigat nga impormasyon nga adda ti baboy iti barangay da a saan met a mangan.
