LAOAG CITY – Kinumpirmaran ni Police Major Joseph Baltazar, ti chief of police ti PNP-San Nicolas a total lockdown iti Barangay 3, Barangay 6, Barangay 14 ken Barangay 18 iti nasao nga ili.
Daytoy ket gapo pay laeng iti panagado ti kaso ti covid-19 iti nadakamat nga ili.
Segun kenni Baltazar, dagiti daduma met a barangay ket sumagmamano laeng a parte na ti nai-lockdown.
Inbatad na nga iti sibubukel nga ili ti San Nicolas ket maipatungpal ti curfew manipud iti alas-nuebe iti rabii agingga iti alas-singko ti parbangon.
Mainaig iti daytoy, kuna ni Baltazar a ti sagsaganaan da iti agdama ket ti resulta ti swab test dagiti dimmalan iti daytoy.
Mangnamnama met daytoy pakairamanan ti sibubukel nga ili nga awanen ti mainayun nga agpositibo iti nadakamat a sakit.
Kabayatanna, immapela ti hepe kadagiti kailyan na a makikooperar tapno saanen nga agwaras ti virus.
