LAOAG CITY – Nagbalin nga emosyonal ti maysa kadagiti uppat a kameng ti Communist Terrorist Group (CTG) kabayatan ti panangilawlawag na dagiti rason no apay a napanunot da ti simmuko iti gobierno.
Immunan nga inbatad ni Major General Andrew D. Costelo PA, Commander ti 7th Infantry (KAUGNAY) Division, Philippine Army nga idi Pebrero 7 ita a tawen ket boluntaryo a simmuko da alyas “Ligaya”, “Teresa”, “Elvie” ken “Marinel” a taga Marcos, Vintar, ken Carasi ditoy Ilocos Norte.
Kuna ni Costelo a bitbit dagiti rebelde dagiti armas da a maysa nga M14 rifle; maysa nga US Remington Model 03-03; ken maysa nga homemade shotgun.
Iti pannakaipresentar dagiti maseknan iti Ilocos Norte Police Provincial Office (INPPO) nga inatendaran ni Governor Matthew Marcos-Manotoc, Provincial Director Pol. Col. Julius Suriben, Regional Director ti PNP-Region 1, mayor iti ili ti Solsona, Carasi ken Marcos, ken sumagmamano a chief of police ditoy probinsya.
Kabayatan ti panagsarita ti maysa kadagiti simmuko a rebelde ket saan a naliklikan ti panagbalin na nga emosyonal no sadinno nga inbatad na nga iti kaadda da iti bantay ket nakilablaban da iti tropa ti gobierno.
Inpalgak na nga iti pannakapaltog ti luppo na ket ditoyen a napabutngan isut gapuna a napanunot na ti bimmaba ken sumuko laengen iti gobierno.
Kuna na nga awan ti napintas a masakbayan na no agtultuloy ti panagtalinaed na iti bantay ken makilaban iti gobierno.
Mamati pay ti maseknan a saan a napurwan iti pannakapaltog na gapu ta adda pay ti sabali a plano ti Diyos kenkuana isut gapuna a saan nga agbabawi iti isusuko na iti gobierno.
Dayawen ti rebel returnee ti ado a programa ti gobierno a makatulong kadakuada isut gapuna nga inkari na a tumulong iti gobierno a mangpatalinaed ti linak, urnus ken talna ditoy probinsya.
