LAOAG CITY – Nagpositibo iti shellfish dagiti uppat a probinsia iti paralytic shellfish poison wenno toxic red tide a limmabes iti regulatory limit basar iti Bureau of Fisheries and Aquatic Resources (BFAR).
Inbatad ti Bureau of Fisheries and Aquatic Resources iti abiso a saan a natalged a kanen dagiti shellfish a nakolektar manipud kadagiti sumagmamano a kabaybayan iti Dumanquillas Bay idiay Zamboanga del Sur, coastal waters ti Leyte idiay Leyte, Matarinao Bay idiay Eastern Samar ken coastal waters ti Tungawan idiay Zamboanga Sibugay Province.
Nupay kasta, inlawlawag ti bureau a natalged a kanen ti dadduma a klase ti seafood pakairamanan ti ikan iti kabaybayan ngem masapol a maugasan a naimbag.
Kabayatanna, inrakurak ti Bureau of Fisheries and Aquatic Resources a natalgeden ti coastal waters ti Daram Island idiay Samar manipud iti toxic red tide.
