LAOAG CITY – Natiliw dagiti uppat nga akusado a maibilang a Most Wanted Person babaen ti panangiserbi ti PNP kadagiti warrant of arrest.
Binigbig ni Police Lt. Tolentino Erum Jr, hepe ti PNP Nueva Era ti immuna a natiliw nga agtawen ti 24, awanan asawa, empleyado ti department store ken agnanaed iti Brgy. Salet ditoy siudad ti Laoag ngem tubo iti Cabittauran iti ili ti Nueva Era.
Naiparuk-at ti warrant arrest idi pay tawen 2015 kontra ti nasao nga akusado gapu ti nalabsing na nga ordinansa a nagmaneho nga awanan iti lisensya.
Nairekomendar ti 500 a pisos a pyansa ti akusado.
Natiliw met ti maysa a lakay nga agtawen ti 71, naasawaan ken residente iti Brgy. Lumbad iti ili ti Dingras.
Naiparuk-at ti warrant arrest kontra ti akusado idi pay tawen 2006.
Sumangsango ti akusado ti panaglabsing ti RA 7610 ken nairekomendar ti 30,000 a pisos a pyansa daytoy.
Kabayatanna, natiliw pay ti akusado nga agtawen ti 68, ken residente iti Brgy. Parparuruc iti il iti Vintar.
Segun kenni Police Lt. Tolentino Erum Jr, hepe ti PNP Nueva Era, naiparuk-at ti warrant of arrest idi tawen 2006 gapu ti child abuse ken nairekomendar ti 80,000 a pisos a pyansa daytoy.
Ken ti maikapat a natiliw ket ti agtawen ti 51 ken residente iti Brgy. Imelda iti ili ti Banna.
Kuna ni Erum a daytoy ti kabayagan a naglemlemmeng nga akusado a natiliw da idi kalman gapu ta naiparuk-at ti warrant arrest idi tawen 2003.
Sumangsango ti akusado ti kaso a Reckless Imprudence Resulting to Homicide ken naikomendar ti 30,000 a pisos a pyansa daytoy.
Nagtalinaed dagiti uppat nga akusado iti PNP Nueva Era ken manamnama ti pannakaidatag dagitoy iti korte a naggapuan dagiti warrant of arrest.
