LAOAG CITY – Inpetteng ni Sen. Win Gatchalian a nasken nga aramiden a prioridad ti gobierno dagiti kakukurapayan nga estudiante kas benepisiario ti Tertiary Education Subsidy (TES) kalpasan a rimmuar iti Year Two Report ti Second Congressional Commission a 39% wenno uppat kadagiti sangapulo nga estudiante ti nagsardeng iti kolehio.
Inbatadna a nangato ti nasao a bilang nangruna ket addan ti Free Higher Education Law.
Inlawlawagna a makapadanag daytoy a datos ken nasken a maaddaan kadagiti interbension tapno masigurado a makumpleto dagiti agad-adal ti edukasionda saan laeng a maaddaan ti access daytoy.
Basar iti report para iti School Year 2022-2023, awan pay ti maysa a porsiento kadagiti benepisiario ti Tertiary Education Subsidy ti manipud kadagiti Pantawid Pamilyang Pilipino Program wenno 4P’s a maikanniwas iti gagem ti linteg a suportaran dagiti marigrigat nga estudiante.
Inlawlawag ni Gatchalian a tapno baliktaren daytoy a pagalagadan, inpayam-ammona ti espesial a probision iti 2024 National Budget a mangibilbilin a maipangpangruna dagiti nakukurapay nga estudiante iti pannakapili ti Tertiary Education Subsidy.
Innayonna a daytoy ti rason isu a ngimmato ti bilang dagiti Tertiary Education Subsidy grantees manipud kadagiti marigrigat iti 27% para iti School Year 2023-2024.
Kabayatanna, daytoy a pagannurotan ket agtultuloy para ita a tawen 2025.
