LAOAG CITY – Saan a pinakawan ti PNP-Bacarra dagiti agsusugal iti maysa a minatayan ti agnagan iti Marino Acidera iti paset ti Bgy. 32 Corocor iti nasao nga ili.
Daytoy ket gapu ta kalpasan nga inoperasyunan da ket nagballaigi a nakatukma da kadagiti agsusugal.
Nabigbig dagitoy a da Larry Leandro y Galicinao, agtawen iti 43 years, naasawaan, driver residente ti Brgy 3, Antonio Laoany Ramos, agtawen ti 34, naasawaan, tricycle driver, residente ti Brgy 32, Jexter Magaoay Y Anday, agtawen ti 22 awanan ti asawa, agtaltalon residente iti Brgy 28 ken Albert Pagaduan y Cabusas, agtawen ti 39, naasawaan , negosyante residente iti Brgy 28 Cabusliga, agpapada iti nasao nga ili.
Rumrumuar a lucky 9 ti ay-ayam da a nakatukmaan pay dagiti pulis ti taya da nga umabot iti 5, 146 pesos ken ti baraha nga us-usaren da iti panagsusugal da.
Insigida nga inpadalan ti pulisya dagiti suspek iti medical examination ken maisagsaganan ti maipila a kaso kontra kadagitoy.
Maipalagip a maipariten ti agsusugal kadagiti minatayan isu a naiget a sipsiputan daytoy dagiti pulis gapu ta imbes a makiaandingay ngem pangrugian metten ti saan a pagkikinnaawatan.
