LAOAG CITY – Naarestar dagiti uppat nga indibidual gapu iti panagsugalda iti billiards iti ili ti Paoay.
Binigbig ni P/Capt. Jackson Sugayen, Hepe ti Paoay Municipal Police Station dagiti suspek nga isuda Jay-ar Acdal nga agtawen iti 39, Ronald Galapia, agtawen iti 30, awanan trabaho, Roland Javier, agtawen iti 42, Atchara Oamil, agtawen iti 20 ken agpapada dagitoy a residente ti Brgy. 25 Cal-laguip iti nasao nga ili.
Inbatadna a balligi a natiliw dagiti suspek kalpasan a nakaawatda ti report nga adda ti agsusugal iti sangoanan ti pagtaengan da Acdal rason a dagusda a nangiwayat ti Anti-Ilegal Gambling Operation.
Gapu iti daytoy, inlawlawagna a nakumpiskar dagiti nagduduma a gambling paraphernalia kas ti stick ken dadduma pay pakairamanan ti 1,034 a pisos a mapapati a nausar kas pusta dagiti suspek.
Innayonna a manamnama a mapilaan ti kaso dagiti nasao a suspek gapu iti panaglabsingda iti Presidential Decree 1602 wenno ti Illegal Gambling Law.
